അല്ലാഹുവിന്റെ കാരുണ്യം
പ്രഭാഷണം: ചെറിയമുണ്ടം അബ്ദുൽ ഹമീദ് മദനി
https://www.youtube.com/watch?v=Mpa5sV3hRho
1. ആമുഖവും മതങ്ങളുടെ ഉത്ഭവത്തെക്കുറിച്ചുള്ള ഭൗതികവാദ വീക്ഷണവും (00:00:08)
1.1 പ്രാരംഭ പ്രാർത്ഥനയും പ്രഭാഷണ ലക്ഷ്യവും (00:00:08)
ബഹുമാന്യരായ സഹോദരന്മാരെ, സഹോദരിമാരെ,
അല്ലാഹുവിന്റെ കാരുണ്യത്തെ സംബന്ധിച്ച് വിശുദ്ധ ഖുർആനിലുള്ള പരാമർശങ്ങളോ തിരുസുന്നത്തിൽ നൽകപ്പെട്ട വിശദീകരണങ്ങളോ ഇങ്ങനെയുള്ള പരിമിതമായ ഒരു പ്രഭാഷണ വേളയിൽ പൂർണ്ണമായി വിശദീകരിക്കുക സാധ്യമല്ല. വളരെ ചുരുങ്ങിയ ചില സൂചനകൾ മാത്രം നൽകാനാണ് ഞാൻ ഈ സന്ദർഭം വിനിയോഗിക്കുന്നത്.
1.2 ഭൗതികവാദികളുടെ സിദ്ധാന്തവും ചരിത്രപരമായ തെറ്റിദ്ധാരണയും (00:01:46)
മതങ്ങളെ സംബന്ധിച്ച് ഭൗതികവാദികൾ പ്രചരിപ്പിക്കുന്നത്, നമ്മുടെ നാട്ടിലുള്ള പല ചരിത്ര പുസ്തകങ്ങളിലും പഠിപ്പിക്കുന്നത്, പ്രകൃതിയിലെ ഭയാനകമായ പല പ്രതിഭാസങ്ങളെയും സംബന്ധിച്ച അതിരറ്റ പേടിയിൽ നിന്നാണ് ദൈവത്തെ സംബന്ധിച്ച ആദ്യത്തെ ചിന്ത ഉടലെടുത്തത് എന്നാണ്. ഭൂകമ്പം, ഇടിമിന്നൽ, വെള്ളപ്പൊക്കം, കടലാക്രമണം ഇങ്ങനെയുള്ള കാര്യങ്ങളെ സംബന്ധിച്ച എന്തെന്നില്ലാത്ത ഭയം മനുഷ്യനെ പിടികൂടുകയും, അതിന്റെയൊക്കെ പിന്നിൽ ഏതോ അഭൗതിക ശക്തികൾ ഉണ്ടെന്ന് വിശ്വസിക്കുകയും ചെയ്തുവെന്നാണ് അവർ വാദിക്കുന്നത്. പ്രകൃതിക്ഷോഭങ്ങളിൽ നിന്ന് രക്ഷപ്പെടാൻ വേണ്ടി ആ അഭൗതിക ശക്തികളെ പ്രീണിപ്പിച്ചാൽ ഗുണം കിട്ടുമെന്ന് മനുഷ്യർ ധരിച്ചതിന്റെ ഫലമായി മഴയ്ക്ക് ഒരു ദൈവം, സമുദ്രത്തിന് ഒരു ദൈവം, ഇടിമിന്നലിന് വേറൊരു ദൈവം എന്നിങ്ങനെ പല ദൈവങ്ങളെ സങ്കൽപ്പിച്ച് മനുഷ്യൻ പൂജിക്കാൻ തുടങ്ങി. കുറേക്കാലം കഴിഞ്ഞ് മനുഷ്യർക്ക് ബുദ്ധിപരമായ വികാസം കിട്ടിയപ്പോൾ ദൈവങ്ങളുടെ എണ്ണം ഒന്നായി ചുരുങ്ങുകയും, കുറേക്കൂടി കഴിഞ്ഞപ്പോൾ ദൈവവിശ്വാസം തന്നെ അനാവശ്യമാണെന്ന് മനുഷ്യർക്ക് ബോധ്യപ്പെടുകയും ചെയ്തു എന്നിങ്ങനെയാണ് മതങ്ങളുടെയും വിശ്വാസത്തിന്റെയും ചരിത്രം പല ഗ്രന്ഥകാരന്മാരും അവതരിപ്പിക്കാറുള്ളത്.
2. വിശുദ്ധ ഖുർആനിൽ അല്ലാഹുവിന്റെ കാരുണ്യത്തിന്റെ സ്ഥാനം (00:03:26)
2.1 ഭയപ്പെടുത്തലല്ല, കാരുണ്യമാണ് പ്രധാനം (00:03:26)
വിശുദ്ധ ഖുർആനെ സംബന്ധിച്ചിടത്തോളം അല്ലാഹുവെ ഭയപ്പെടണം എന്ന് പഠിപ്പിക്കുന്നുണ്ട്. അല്ലാഹുവിന്റെ ശിക്ഷയെ സംബന്ധിച്ച് മുന്നറിയിപ്പ് നൽകുന്നുമുണ്ട്. എന്നാൽ അല്ലാഹുവിനെ പരിചയപ്പെടുത്തുന്നിടത്ത് ഏറ്റവും പ്രധാനമായി കടുത്ത ശിക്ഷ നൽകുന്നവൻ എന്നതോ, അങ്ങേയറ്റം പേടിക്കപ്പെടേണ്ടവൻ എന്നതോ അല്ല മുന്നിൽ നിൽക്കുന്നത്. വിശുദ്ധ ഖുർആനിലെ 114 അധ്യായങ്ങളിൽ 113 എണ്ണത്തിന്റെ ആരംഭത്തിലും, ഒരു സൂറത്തിന്റെ മധ്യത്തിലുമായി 114 സന്ദർഭങ്ങളിൽ 'ബിസ്മില്ലാഹി റഹ്മാനി റഹീം' എന്ന് പറയുന്നുണ്ട്. അല്ലാഹുവിന്റെ നാമത്തിൽ എന്ന് പറഞ്ഞു കഴിഞ്ഞ ഉടനെ അല്ലാഹുവെ പരിചയപ്പെടുത്തുന്നത് അവൻ 'റഹ്മാനും' 'റഹീമും' ആണ് എന്നാണ്.
2.2 'റഹ്മാൻ', 'റഹീം' എന്നീ നാമങ്ങളുടെ പൊരുൾ (00:04:14)
'റഹ്മാൻ' എന്ന വാക്കിന് നമ്മുടെ പൂർവികന്മാരൊക്കെ അർത്ഥം പറഞ്ഞു വന്നിരുന്നത് വഴിപ്പെട്ടവർക്കും വഴിപ്പെടാത്തവർക്കും ഒരുപോലെ കൃപ ചെയ്യുന്നവൻ എന്നാണ്. പടച്ചവന്റെ മാർഗ്ഗനിർദ്ദേശങ്ങൾ സ്വീകരിക്കുന്ന ആളുകൾക്കും സ്വീകരിക്കാത്ത ആളുകൾക്കും ഒരുപോലെ കാരുണ്യം ചൊരിഞ്ഞു കൊടുക്കുന്നവൻ എന്നാണ് അതിന്റെ അർത്ഥം. 'റഹീം' എന്ന വാക്കിന് നൽകപ്പെടുന്ന വിശദീകരണം, അനന്തമായ പരലോകത്തിൽ അല്ലാഹുവിന്റെ മാർഗ്ഗദർശനം സ്വീകരിച്ച ആളുകൾക്ക് മാത്രം അപാരമായ കാരുണ്യം നൽകുന്നവൻ, അവരോട് മാത്രം അപാരമായ കനിവ് കാണിക്കുന്നവൻ എന്നാണ്.
എന്തായിരുന്നാലും ഈ ദുനിയാവിലെയും ആഖിറത്തിലെയും പടച്ചതമ്പുരാന്റെ കാരുണ്യത്തെ സംബന്ധിച്ച പരാമർശമാണ് അല്ലാഹു എന്ന നാമം പറഞ്ഞ ഉടനെ ഖുർആനിൽ വരുന്നത്. അല്ലാഹുവെ ഭയപ്പെടേണ്ടതുണ്ട്, അല്ലാഹുവിന്റെ വിധിവിലക്കുകൾ കാത്തുസൂക്ഷിക്കേണ്ടതുണ്ട്, അവന്റെ ശിക്ഷ കഠിനമാണ് എന്ന കാര്യത്തിൽ സംശയമില്ല. എന്നാലും അല്ലാഹുവിനെ പരിചയപ്പെടുത്തുന്നിടത്ത് ഏറ്റവും പ്രധാനമായി പറയുന്ന കാര്യം അവന്റെ കാരുണ്യത്തെ സംബന്ധിച്ചാണ്. ഈ കാരുണ്യത്തെ സംബന്ധിച്ച അഗാധമായ വിശ്വാസമാണ് നമ്മളെ അല്ലാഹുവിലേക്ക് അടുപ്പിക്കുന്ന ഘടകങ്ങളിൽ ഏറ്റവും പ്രധാനപ്പെട്ടത്.
2.3 ഖൗഫും റജാഉം: സത്യവിശ്വാസിയുടെ മാനസികാവസ്ഥ (00:05:29)
സത്യവിശ്വാസിയുടെ മാനസികാവസ്ഥയെ സംബന്ധിച്ച് പല ഹദീസുകളിലും പരാമർശിക്കപ്പെട്ടിട്ടുണ്ട്. അതിൽ ഖൗഫിന്റെയും (ഭയം) റജാഇന്റെയും (പ്രതീക്ഷ) മധ്യത്തിലായിരിക്കും സത്യവിശ്വാസിയുടെ അവസ്ഥ എന്നാണ് വിശദീകരിക്കപ്പെടുന്നത്. 'റജാഅ്' എന്ന് പറഞ്ഞാൽ പടച്ചവന്റെ കാരുണ്യത്തെയും പ്രതിഫലത്തെയും അനുഗ്രഹങ്ങളെയും സംബന്ധിച്ച പ്രതീക്ഷയാണ്. അവന്റെ ശിക്ഷയെ സംബന്ധിച്ച ഭയമാണ് 'ഖൗഫ്'. ഇത് രണ്ടും കൂടി ഒന്നിച്ചു ചേരുമ്പോഴാണ് മനുഷ്യന്മാർ യഥാർത്ഥത്തിൽ സച്ചരിതരായിത്തീരുന്നത്.
2.4 ദിക്റും ശുക്റും: കാരുണ്യത്തോടുള്ള സജീവ പ്രതികരണം (00:06:18)
ഈ റജാഇന്റെയും ഖൗഫിന്റെയും ഭാഗമായിട്ട് റഹ്മാനും റഹീമുമായ അല്ലാഹുവോടുള്ള നമ്മുടെ ഏറ്റവും പ്രധാനപ്പെട്ട വികാരം ദിക്റും ശുക്റും ആയിരിക്കണം എന്നാണ് ഖുർആന്റെ വിവിധ ഭാഗങ്ങളിൽ നിന്ന് മനസ്സിലാക്കാൻ കഴിയുന്നത്. 'ദിക്ർ' എന്ന് പറഞ്ഞാൽ ജീവിതത്തിലെ എല്ലാ സന്ദർഭങ്ങളിലും പടച്ചവനെ സംബന്ധിച്ച സ്മരണയാണ്, ഓർമ്മയാണ്. നാം ഓരോ അനുഗ്രഹങ്ങൾ ആസ്വദിക്കുമ്പോഴും, ഓരോ ദൃഷ്ടാന്തങ്ങൾ കാണുമ്പോഴും, ഓരോ ശിക്ഷയുടെ ചിഹ്നങ്ങൾ കാണുമ്പോഴുമെല്ലാം സർവ്വശക്തനായ പടച്ചവനെ സംബന്ധിച്ച ഓർമ്മയുണ്ടാവണം. ആ ഓർമ്മ നമ്മെ നയിക്കേണ്ടത് അവനോടുള്ള കൃതജ്ഞതയിലേക്കാണ് (ശുക്ർ). അങ്ങനെ ദിക്റിന്റെയും ശുക്റിന്റെയും മാർഗ്ഗത്തിലൂടെയാണ് അല്ലാഹുവുമായുള്ള നമ്മുടെ ബന്ധം സജീവമാകുന്നതും പൂർണ്ണമായും ഗാഢമായിത്തീരുന്നതും.
ആ ശുക്റിന് നിദാനമായിട്ടുള്ള ഒരുപാട് കാര്യങ്ങൾ വിശുദ്ധ ഖുർആൻ ചൂണ്ടിക്കാണിക്കുന്നുണ്ട്:
നമ്മുടെ സ്വന്തം ശരീരഘടനയുമായി ബന്ധപ്പെട്ട കാര്യങ്ങൾ.
നമുക്ക് ചുറ്റും പ്രകൃതിയിൽ വ്യാപിച്ചു കിടക്കുന്ന പടച്ചവന്റെ അനുഗ്രഹങ്ങൾ.
പടച്ചവൻ ഓരോ വ്യക്തിയുടെയും വ്യക്തിജീവിതത്തിൽ നൽകിക്കൊണ്ടിരിക്കുന്ന നിത്യേനയുള്ള അനുഗ്രഹങ്ങൾ.
പടച്ചവൻ അവന്റെ വേദഗ്രന്ഥങ്ങളിലൂടെയും പ്രവാചക നിയോഗത്തിലൂടെയും നൽകിയ സന്മാർഗ്ഗ കാരുണ്യം.
ഇങ്ങനെയുള്ള കാരുണ്യത്തിന്റെ പല തലങ്ങളെ സംബന്ധിച്ചും വ്യക്തമായി നാം മനസ്സിലാക്കുമ്പോൾ, ഇസ്ലാമിന്റെ വിശ്വാസവും ഇസ്ലാമിന്റെ അനുഷ്ഠാനങ്ങളുമെല്ലാം നമ്മുടെ സർവ്വതോമുഖമായ വിജയത്തിന് അനിവാര്യമായ കാര്യങ്ങളാണെന്നും, അതൊന്നും നമ്മെ വിഷമിപ്പിക്കാനുള്ളതല്ലെന്നും, പടച്ചവൻ ചൂണ്ടിക്കാണിക്കുന്ന മാർഗ്ഗത്തിലൂടെ മുന്നോട്ടു പോയാൽ നമുക്ക് സമാധാനവും സുരക്ഷിതത്വവും (അമാനും സലാമും) അതിന്റെ പൂർണ്ണമായ അളവിൽ ലഭിക്കുമെന്നും നമുക്ക് ബോധ്യപ്പെടും.
3. ആദ്യ ദിവ്യസന്ദേശവും മനുഷ്യന്റെ സവിശേഷ സൃഷ്ടിപ്പും (00:08:03)
3.1 ഹിറാ ഗുഹയിലെ ആദ്യ സന്ദേശം (00:08:03)
ഹിറാ ഗുഹയിൽ വെച്ച് മുഹമ്മദ് നബി(സ)ക്ക് ജിബ്രീൽ(അ) എന്ന മലക്ക് മുഖേന ആദ്യമായി അവതരിപ്പിക്കപ്പെട്ട വചനം നേരത്തെ പറഞ്ഞ ഭൗതികവാദ വ്യാഖ്യാതാക്കൾ പറയുന്നതുപോലെ ഇടിമിന്നലിനെയോ വരൾച്ചയെയോ കൊടുങ്കാറ്റിനെയോ ഭയപ്പെടാനല്ല പഠിപ്പിക്കുന്നത്. നിസ്സാരമായ ഒരു ഭ്രൂണത്തിൽ നിന്ന് മനുഷ്യനെ സൃഷ്ടിച്ചു വളർത്തിയിട്ട് അവനെ എഴുത്തുകാരനും ജ്ഞാനിയുമാക്കി മാറ്റിയ പടച്ചതമ്പുരാന്റെ അപാരമായ അനുഗ്രഹത്തെ സംബന്ധിച്ച് ഓർമ്മിപ്പിക്കുകയും, ആ പരിപാലകനായ റബ്ബിന്റെ നാമത്തിൽ വായിക്കാൻ ആഹ്വാനം ചെയ്യുകയുമാണ് ആ വചനം ചെയ്യുന്നത്.
﴿ اقْرَأْ بِاسْمِ رَبِّكَ الَّذِي خَلَقَ خَلَقَ الْإِنسَانَ مِنْ عَلَقٍ اقْرَأْ وَرَبُّكَ الْأَكْرَمُ الَّذِي عَلَّمَ بِالْقَلَمِ عَلَّمَ الْإِنسَانَ مَا لَمْ يَعْلَمْ ﴾
(സൂറത്ത് അൽഅലഖ് [96]: 1-5)
പല മതങ്ങളും അന്ധവിശ്വാസങ്ങളും ഭയങ്ങളും മനുഷ്യന്റെ മനസ്സിൽ ഉണ്ടാക്കുമ്പോൾ, മുഹമ്മദ് നബി(സ)ക്ക് ആദ്യമായി കേൾപ്പിക്കപ്പെട്ട വചനം റബ്ബിനെ പരിചയപ്പെടുത്തുകയാണ്. 'റബ്ബ്' എന്ന വാക്കിന്റെ ശരിയായ അർത്ഥം പോറ്റി വളർത്തുന്നവൻ എന്നാണ്. നമ്മുടെ മാതാപിതാക്കളെക്കാൾ ഉപരിയായി നമ്മുടെ ആവിർഭാവത്തിനും വളർച്ചയ്ക്കും പുരോഗതിക്കും ആവശ്യമായ മുഴുവൻ കാര്യങ്ങളും നൽകി സംരക്ഷിക്കുന്നവനാണ് റബ്ബ്. ആ പോറ്റി വളർത്തുന്നവൻ എങ്ങനെയാണ് നമ്മെ വളർത്തുന്നത് എന്ന പരാമർശത്തോടെയാണ് വചനങ്ങൾ ആരംഭിക്കുന്നത്. മനുഷ്യർക്ക് അക്ഷരവിദ്യ നൽകിയ, മനുഷ്യരെ ജ്ഞാനികളാക്കിയ, മനുഷ്യരെ ഭ്രൂണത്തിൽ നിന്ന് വളർത്തിയ റബ്ബ്!
3.2 'അലഖ്' എന്ന പദവും ആധുനിക ഭ്രൂണശാസ്ത്രവും (00:10:41)
ഈ വാക്യങ്ങളിൽ അടങ്ങിയിട്ടുള്ള ആശയങ്ങളെ സംബന്ധിച്ച് പണ്ടുകാലത്ത് മനുഷ്യർക്ക് ചിന്തിക്കാൻ കഴിഞ്ഞതിനേക്കാൾ എത്രയോ ഇരട്ടി ബൃഹത്തായ കാര്യങ്ങൾ ഇന്ന് ആധുനിക ശാസ്ത്രത്തിന് മനസ്സിലാക്കാൻ കഴിഞ്ഞിട്ടുണ്ട്. ഈ ഭൂമുഖത്തുള്ള ജന്തുജാലങ്ങളിൽ മിക്കതും ഭ്രൂണത്തിൽ നിന്നാണ് വളരുന്നത്. പിതാവിന്റെ ബീജവും മാതാവിന്റെ അണ്ഡവും ചേർന്നുണ്ടാകുന്ന സംയുക്ത ബീജത്തിനാണ് ഭ്രൂണം എന്ന് പറയുന്നത്. 'അലഖ്' (عَلَق) എന്ന അറബി പദത്തിൽ തന്നെ അത്ഭുതകരമായ ഒരു ആശയമുണ്ട്.
'അലഖ്' എന്ന വാക്കിന് പണ്ടുകാലത്ത് രക്തപിണ്ഡം എന്നൊക്കെയാണ് അർത്ഥം പറഞ്ഞിരുന്നതെങ്കിലും, അറബി ഭാഷയിൽ ആ വാക്കിന്റെ സാർവത്രികമായ ഒരർത്ഥം 'നീരട്ട' (leech) എന്നാണ്. വെള്ളത്തിൽ ജീവിക്കുന്ന, ശരീരത്തിൽ കടിച്ചുതൂങ്ങി രക്തം കുടിക്കുന്ന അട്ടയ്ക്കാണ് അറബിയിൽ 'അലഖ്' എന്ന് പറയുന്നത്. ഈ അട്ടയും മനുഷ്യന്റെ ആദിരൂപവും തമ്മിലുള്ള ബന്ധത്തെക്കുറിച്ച് മുൻകാലത്ത് വ്യക്തമായ ധാരണയുണ്ടായിരുന്നില്ല. എന്നാൽ ആധുനിക ഭ്രൂണശാസ്ത്രം (Embryology) വ്യക്തമാക്കുന്നത്, ഗർഭാശയത്തിന്റെ ഉള്ളിലെ പാളിയിൽ ഒരു അട്ട എങ്ങനെ പറ്റിപ്പിടിച്ച് തൂങ്ങുന്നുവോ, അതുപോലെ തൂങ്ങിപ്പിടിച്ചും അള്ളിപ്പിടിച്ചുമാണ് ഭ്രൂണം വളരാൻ തുടങ്ങുന്നത് എന്നാണ്. അങ്ങനെ പറ്റിപ്പിടിച്ചു തൂങ്ങി വളരുന്ന ആ അവസ്ഥയെ സൂചിപ്പിക്കാനാണ് 'അലഖ്' എന്ന പദം വിശുദ്ധ ഖുർആൻ പ്രയോഗിച്ചിട്ടുള്ളത് എന്ന് ഖുർആനിക ഭ്രൂണശാസ്ത്ര ഗവേഷകർ ചൂണ്ടിക്കാണിക്കുന്നു.
3.3 മനുഷ്യനും ഇതര ജന്തുക്കളും തമ്മിലുള്ള വ്യത്യാസം (00:12:46)
വളരെ നിസ്സാരവും സൂക്ഷ്മവുമായ ഒരു കോശത്തിൽ നിന്നാണ് മനുഷ്യൻ ഉണ്ടാകുന്നത്. മനുഷ്യൻ മാത്രമല്ല, എല്ലാ സസ്തനികളും ഭ്രൂണത്തിൽ നിന്നാണ് വളർന്നുവരുന്നത്. എന്നാൽ അങ്ങനെ ഭ്രൂണത്തിൽ നിന്ന് വളർന്നുവന്ന ലക്ഷക്കണക്കിന് ജന്തുവർഗ്ഗങ്ങളിൽ ഒരു ജന്തുവും ഇന്നുവരെ ജ്ഞാനിയോ പണ്ഡിതനോ ആയിട്ടില്ല! ഒരു ജന്തുവും എഴുത്തുകാരനായിട്ടില്ല! ഒരു ജന്തുവും സ്വതന്ത്രമായ ഭാഷ വിനിയോഗിച്ചിട്ടില്ല! കാരണം അവയുടെയൊക്കെ ശാരീരിക ഘടന മനുഷ്യനിൽ നിന്ന് തികച്ചും വ്യത്യസ്തമാണ്. മനുഷ്യനും മൃഗങ്ങളും തമ്മിലുള്ള ഈ വ്യത്യാസം അവരുടെ തലച്ചോറിന്റെ ഘടനയിൽ നിന്ന് തന്നെ തുടങ്ങുന്നു.
മനുഷ്യന്റെ തലച്ചോറ് പ്രധാനമായും അവനെ വാഗ്മിയും എഴുത്തുകാരനുമാക്കി മാറ്റാൻ സംവിധാനിക്കപ്പെട്ടതാണ്. ജന്തുക്കളുടെ തലച്ചോറ് പ്രധാനമായും അവയെ പേശീബലമുള്ളവയാക്കി (muscle power) മാറ്റാൻ വേണ്ടി സംവിധാനിക്കപ്പെട്ടതാണ്.
3.4 മുലപ്പാലിന്റെ ഘടനയിലെ അത്ഭുതവും വിജ്ഞാന വികാസവും (00:13:54)
ഈ വ്യത്യാസം ആരംഭിക്കുന്നത് മനുഷ്യരും ജന്തുക്കളും കുടിച്ചു വളരുന്ന മുലപ്പാൽ മുതൽക്കാണ്. ജനിച്ചയുടനെ മറ്റു ഭക്ഷണങ്ങൾ കഴിക്കാൻ കഴിയാത്ത അവസ്ഥയിൽ കുഞ്ഞിന്റെ ആവശ്യങ്ങൾക്ക് തികച്ചും ഇണങ്ങുന്ന പാൽ മാതാക്കളുടെ മാറിടത്തിൽ പടച്ചവൻ സജ്ജമാക്കുന്നു. ജനിച്ചയുടനെ രോഗപ്രതിരോധത്തിന് ആവശ്യമായ ഘടകങ്ങളും, പിന്നീട് വളർച്ചയുടെ ഓരോ ഘട്ടത്തിലും ആവശ്യമായ ചേരുവകളും അടങ്ങിയ പാലാണ് ഉണ്ടാവുന്നത്.
മൃഗങ്ങളുടെ പാലിലും മനുഷ്യന്റെ പാലിലും ഉള്ള ഘടകങ്ങൾ തമ്മിൽ വലിയ വ്യത്യാസമുണ്ട്:
മനുഷ്യന്റെ മുലപ്പാലിൽ: താരതമ്യേന ഗ്ലൂക്കോസിന്റെ (ലാക്ടോസ്/കാർബോഹൈഡ്രേറ്റ്) അളവ് വളരെ കൂടുതലാണ്; പ്രോട്ടീൻ ആനുപാതികമായി കുറവാണ്. മുലപ്പാലിലെ ഗ്ലൂക്കോസ് തലച്ചോറും ബുദ്ധിയും വിജ്ഞാനവും വളർത്താനുള്ളതാണ്.
മൃഗങ്ങളുടെ പാലിൽ: പ്രോട്ടീന്റെ അംശം വളരെ കൂടുതലാണ്; ഗ്ലൂക്കോസ് വളരെ കുറവാണ്. പ്രോട്ടീൻ പേശികൾ (muscles) വേഗത്തിൽ വളർത്താനുള്ളതാണ്.
മൃഗങ്ങളുടെ കുഞ്ഞുങ്ങൾ ആറുമാസമോ ഒരു വർഷമോ കൊണ്ട് ഓടാനും ചാടാനും ഇരതേടാനും പേശീബലമുള്ളവയായി മാറുന്നു. എന്നാൽ മനുഷ്യക്കുഞ്ഞ് രണ്ടു വയസ്സാകുമ്പോഴേക്കും പേശീബലം കൊണ്ട് ലോകം കീഴടക്കുകയല്ല വേണ്ടത്; മറിച്ച് സംസാരിക്കാനും ചിന്തിക്കാനും എഴുതാനും ബുദ്ധി ഉപയോഗിച്ച് നാഗരികതയെ മുന്നോട്ടു നയിക്കാനുമാണ് സജ്ജനാകേണ്ടത്. അതുകൊണ്ടാണ് മനുഷ്യന്റെ മുലപ്പാലിൽ ഗ്ലൂക്കോസിന്റെ അളവ് വർദ്ധിപ്പിച്ചിരിക്കുന്നത്.
﴿ وَاللَّهُ أَخْرَجَكُم مِّن بُطُونِ أُمَّهَاتِكُمْ لَا تَعْلَمُونَ شَيْئًا وَجَعَلَ لَكُمُ السَّمْعَ وَالْأَبْصَارَ وَالْأَفْئِدَةَ لَعَلَّكُمْ تَشْكُرُونَ ﴾
(സൂറത്ത് അന്നഹ്ൽ [16]: 78)
മനുഷ്യൻ ജനിച്ചുവീഴുമ്പോൾ ഒന്നും അറിയാത്തവനാണ്. എന്നാൽ കടലാമയുടെ കുഞ്ഞ് മുട്ടവിരിഞ്ഞ് പുറത്തുവന്നാൽ ആരും പഠിപ്പിക്കാതെ നേരെ കടലിലേക്ക് നീന്തുന്നു. എല്ലാ ജന്തുക്കൾക്കും അവയുടെ ജന്മവാസനയുടെ അടിസ്ഥാനത്തിൽ ജീവിക്കാനുള്ള അറിവുണ്ട്. എന്നാൽ മനുഷ്യക്കുഞ്ഞിന് തുടക്കത്തിൽ ഒന്നുമറിയില്ലെങ്കിലും പത്തോ പതിനഞ്ചോ വയസ്സാകുമ്പോഴേക്കും അവൻ വിജ്ഞാനത്തിന്റെ വലിയൊരു ശേഖരത്തിന്റെ ഉടമയായി മാറുന്നു. പതിനായിരം വർഷം മുമ്പുള്ള പശുവിനും ഇന്നത്തെ പശുവിനും ഒരേ അറിവാണെങ്കിൽ, മനുഷ്യന്റെ വിജ്ഞാനം തലമുറകളിലൂടെ വിപ്ലവകരമായി വളർന്നുകൊണ്ടേയിരിക്കുന്നു.
3.5 മോട്ടോർ കോർട്ടക്സും ഖലമും ബയാനും (00:17:49)
ശരീര ചലനങ്ങളെ നിയന്ത്രിക്കുന്ന തലച്ചോറിലെ ഭാഗമാണ് 'മോട്ടോർ കോർട്ടക്സ്' (Motor Cortex). ശരീരത്തിലെ ഓരോ അവയവങ്ങളുടെയും ചലനം നിയന്ത്രിക്കാൻ മസ്തിഷ്ക കോശങ്ങൾ (Neurons) നീക്കിവെച്ചിരിക്കുന്ന ഭാഗമാണിത്. ജന്തുക്കളിൽ അവയവങ്ങളുടെ വലിപ്പത്തിനനുസരിച്ചാണ് ന്യൂറോണുകൾ വീതിക്കപ്പെട്ടിരിക്കുന്നത് (വലിയ ശരീരഭാഗങ്ങൾക്ക് കൂടുതൽ ന്യൂറോണുകൾ).
എന്നാൽ മനുഷ്യന്റെ കാര്യത്തിൽ വളരെ അത്ഭുതകരമായ ഒരു സവിശേഷതയുണ്ട്. മനുഷ്യന്റെ മോട്ടോർ കോർട്ടക്സിൽ ആനുപാതികമായി ഏറ്റവും കൂടുതൽ കോശങ്ങൾ നീക്കിവെച്ചിരിക്കുന്നത് രണ്ട് പ്രധാന ഭാഗങ്ങൾക്കാണ്:
വിരൽത്തുമ്പുകൾ (Fingertips): അതിസൂക്ഷ്മമായ കാര്യങ്ങൾ ചെയ്യാനും, പേന പിടിക്കാനും, എഴുതാനും, കാലിഗ്രാഫിയും ചിത്രകലയും നിർവ്വഹിക്കാനും വേണ്ടിയാണിത്. ഇതാണ് ഖുർആൻ പറഞ്ഞ 'അല്ലമ ബിൽ ഖലം' (പേന കൊണ്ട് പഠിപ്പിച്ചു).
ചുണ്ടുകളും നാവും ഉൾപ്പെടുന്ന വദനഭാഗം (Lips & Tongue): വിപുലവും സ്വതന്ത്രവുമായ ഭാഷ സംസാരിക്കാനും ആശയങ്ങൾ വിശദീകരിക്കാനും വേണ്ടിയാണിത്. ഇതാണ് ഖുർആൻ പറഞ്ഞ 'അല്ലമഹുൽ ബയാൻ' (വിശദീകരണ ശേഷി പഠിപ്പിച്ചു).
﴿ الرَّحْمَٰنُ عَلَّمَ الْقُرْآنَ خَلَقَ الْإِنسَانَ عَلَّمَهُ الْبَيَانَ ﴾
(സൂറത്ത് അർറഹ്മാൻ [55]: 1-4)
ന്യൂറോണുകളുടെ എണ്ണത്തിന് ആനുപാതികമായി മനുഷ്യന്റെ ഒരു ചിത്രം വരച്ചാൽ (Cortical Homunculus), വലിയ കൈവിരലുകളും വലിയ ചുണ്ടും നാവുമുള്ള ഒരു രൂപമായിരിക്കും ലഭിക്കുക എന്ന് മെഡിക്കൽ ഫിസിയോളജി ഗ്രന്ഥങ്ങളിൽ വ്യക്തമാക്കുന്നുണ്ട്. ഹിറാ ഗുഹയിൽ ലഭിച്ച ആദ്യ ദിവ്യസന്ദേശം മനുഷ്യന്റെ ഈ അത്ഭുതകരമായ ശാരീരിക-മാനസിക ഘടനയെയും അനുഗ്രഹങ്ങളെയും ചൂണ്ടിക്കാണിച്ചുകൊണ്ടുള്ളതായിരുന്നു എന്നത് എത്രയോ ചിന്താർഹമാണ്!
4. കാരുണ്യത്തിന്റെ അപാരമായ വിശാലത (00:24:45)
4.1 സകല വസ്തുക്കളെയും ഉൾക്കൊള്ളുന്ന കാരുണ്യം (00:24:45)
അല്ലാഹുവിന്റെ ശിക്ഷയെ സംബന്ധിച്ച് നമുക്ക് ഭയമുണ്ടാകാം. എന്നാൽ ആ ഭയത്തേക്കാളേറെ നമ്മെ നയിക്കേണ്ടത് അല്ലാഹുവിന്റെ റഹ്മത്തിനെ സംബന്ധിച്ച ബോധമാണ്. വിശുദ്ധ ഖുർആൻ പറയുന്നു:
﴿ قَالَ عَذَابِي أُصِيبُ بِهِ مَنْ أَشَاءُ وَرَحْمَتِي وَسِعَتْ كُلَّ شَيْءٍ فَسَأَكْتُبُهَا لِلَّذِينَ يَتَّقُونَ وَيُؤْتُونَ الزَّكَاةَ وَالَّذِينَ هُم بِآيَاتِنَا يُؤْمِنُونَ ﴾
(സൂറത്ത് അൽഅഅ്റാഫ് [7]: 156)
അല്ലാഹു പ്രഖ്യാപിച്ചു: "എന്റെ ശിക്ഷ ഞാൻ ഉദ്ദേശിക്കുന്നവർക്ക് ഞാൻ ബാധിപ്പിക്കുന്നതാണ്. എന്നാൽ എന്റെ കാരുണ്യമാകട്ടെ, അത് സകല വസ്തുക്കളെയും ഉൾക്കൊള്ളാൻ മാത്രം വിശാലമായിരിക്കുന്നു." ശിക്ഷ ചിലർക്ക് മാത്രമുള്ളതാണ്; കാരുണ്യമോ സകല സൃഷ്ടികളെയും ഉൾക്കൊള്ളുന്നതാണ്. പരലോകത്തിൽ ഈ പ്രത്യേക കാരുണ്യം സൂക്ഷ്മത പാലിക്കുകയും സകാത്ത് നൽകുകയും ദൃഷ്ടാന്തങ്ങളിൽ വിശ്വസിക്കുകയും ചെയ്യുന്നവർക്ക് രേഖപ്പെടുത്തും. അതാണ് 'റഹീം' എന്നതിന്റെ താല്പര്യം. ഇഹലോകത്തിലാകട്ടെ, അല്ലാഹുവിന്റെ കാരുണ്യം സർവ്വ ചരാചരങ്ങൾക്കും ലഭ്യമാണ്.
4.2 അല്ലാഹുവിന്റെ കാരുണ്യത്തിൽ നിരാശപ്പെടരുത് (00:26:15)
അല്ലാഹുവിന്റെ കാരുണ്യത്തെക്കുറിച്ച് ഒരു വിശ്വാസിക്കും യാതൊരു സംശയമോ നിരാശയോ ഉണ്ടാകാൻ പാടില്ല. ഇബ്രാഹീം നബി(അ) പറഞ്ഞതായി ഖുർആൻ ഉദ്ധരിക്കുന്നു:
﴿ قَالَ وَمَن يَقْنَطُ مِن رَّحْمَةِ رَبِّهِ إِلَّا الضَّالُّونَ ﴾
(സൂറത്ത് അൽഹിജ്ർ [15]: 56)
"തന്റെ റബ്ബിന്റെ കാരുണ്യത്തെക്കുറിച്ച് വഴിപിഴച്ചവരല്ലാതെ മറ്റാരാണ് നിരാശപ്പെടുക?" എത്ര വലിയ തെറ്റുകുറ്റങ്ങൾ ചെയ്തവരാണെങ്കിലും അല്ലാഹുവിന്റെ കാരുണ്യത്തിൽ നിരാശരാകരുതെന്ന് അല്ലാഹു കൽപ്പിക്കുന്നു:
﴿ قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ﴾
(സൂറത്ത് അസ്സുമർ [39]: 53)
"സ്വന്തം ആത്മാക്കളോട് അതിക്രമം പ്രവർത്തിച്ചുപോയ എന്റെ ദാസന്മാരേ, അല്ലാഹുവിന്റെ കാരുണ്യത്തെക്കുറിച്ച് നിങ്ങൾ നിരാശപ്പെടരുത്. തീർച്ചയായും അല്ലാഹു സകല പാപങ്ങളും പൊറുക്കുന്നതാണ്. അവൻ ഏറെ പൊറുക്കുന്നവനും കരുണാനിധിയുമാകുന്നു." ഖേദിച്ചു മടങ്ങാൻ തയ്യാറായാൽ അല്ലാഹു സർവ്വ പാപങ്ങളും പൊറുത്തു തരും.
അല്ലാഹു കാരുണ്യത്തെ സ്വന്തം ബാധ്യതയായി തന്നെ നിശ്ചയിച്ചിരിക്കുന്നു:
﴿ كَتَبَ رَبُّكُمْ عَلَىٰ نَفْسِهِ الرَّحْمَةَ ﴾
(സൂറത്ത് അൽഅൻആം [6]: 54)
﴿ قُل لِّمَن مَّا فِي السَّمَاوَاتِ وَالْأَرْضِ قُل لِّلَّهِ كَتَبَ عَلَىٰ نَفْسِهِ الرَّحْمَةَ ﴾
(സൂറത്ത് അൽഅൻആം [6]: 12)
ആകാശഭൂമികളിലുള്ള ആരും തന്നെ അല്ലാഹുവിന്റെ കാരുണ്യത്തിന്റെ തണലിൽ നിന്ന് പുറത്തുപോകുന്നില്ല. എല്ലാ സമയത്തും അവന്റെ കാരുണ്യം നമ്മെ വലയം ചെയ്തുകൊണ്ടിരിക്കുകയാണ്.
5. പരീക്ഷണങ്ങളും പ്രയാസങ്ങളും: കാരുണ്യത്തിന്റെ മറഞ്ഞിരിക്കുന്ന തലങ്ങൾ (00:29:05)
5.1 പ്രതിസന്ധികളിലെ തെറ്റിദ്ധാരണകൾ (00:29:05)
നമുക്ക് വേദനയോ രോഗമോ കച്ചവടത്തിൽ നഷ്ടമോ വിമർശനങ്ങളോ വരുമ്പോൾ അല്ലാഹുവിന്റെ കാരുണ്യം നിലച്ചുപോയോ എന്ന ആശങ്ക പലർക്കും ഉണ്ടാകാറുണ്ട്. ഈമാൻ ബലഹീനമാകുന്ന സന്ദർഭങ്ങളിൽ അല്ലാഹു നമ്മെ കൈയൊഴിഞ്ഞു എന്ന തെറ്റായ ധാരണ ചിലർക്കുണ്ടാകുന്നു. എന്നാൽ നാം മനസ്സിലാക്കേണ്ടത്, പരീക്ഷിക്കുമ്പോഴും വേദന വരുത്തുമ്പോഴും രോഗം തരുമ്പോഴും മരിപ്പിക്കുമ്പോഴും അല്ലാഹു റഹ്മാനും റഹീമുമാണ്. അവന് ഈ വിശേഷണങ്ങൾ ഒരിക്കലും ഇല്ലാതെയാകുന്നില്ല.
﴿ وَإِن تَعُدُّوا نِعْمَةَ اللَّهِ لَا تُحْصُوهَا إِنَّ الْإِنسَانَ لَظَلُومٌ كَفَّارٌ ﴾
(സൂറത്ത് ഇബ്രാഹീം [14]: 34)
അല്ലാഹുവിന്റെ അനുഗ്രഹങ്ങൾ എണ്ണാൻ ശ്രമിച്ചാൽ ആർക്കും അത് തിട്ടപ്പെടുത്താൻ കഴിയില്ല. എന്നാൽ ചെറിയൊരു പ്രയാസം വരുമ്പോഴേക്ക് പഴയ അനുഗ്രഹങ്ങൾ മുഴുവൻ മറന്ന് മനുഷ്യൻ കടുത്ത അതിക്രമകാരിയും നന്ദികെട്ടവനുമായി (ളലൂമുൻ കഫാർ) മാറുന്നു.
5.2 വേദന: ഒരു മഹാ അനുഗ്രഹവും മുന്നറിയിപ്പ് സംവിധാനവും (00:33:45)
പലരും അസഹനീയമായ ഒന്നായി മാത്രം കാണുന്ന 'വേദന' യഥാർത്ഥത്തിൽ അല്ലാഹുവിന്റെ ഏറ്റവും വലിയ അനുഗ്രഹങ്ങളിൽ ഒന്നാണ്. വേദനയില്ലാതെ ഒരു കുട്ടി ജനിച്ചാൽ അവന് ഈ ഭൂമിയിൽ ജീവിച്ചിരിക്കാൻ കഴിയില്ല. ശരീരത്തിൽ ഒരു ചെറിയ പോറലേറ്റാലോ, തീക്കനൽ തട്ടിയാലോ, മുള്ള് കൊണ്ടാലോ ഉടനെ ആത്മരക്ഷയ്ക്കായി കാൽ പിൻവലിക്കാൻ തലച്ചോറിലേക്ക് അപായ സന്ദേശം എത്തിക്കുന്ന സന്ദേശവാഹകനാണ് വേദന.
വേദന അനുഭവിക്കാൻ കഴിയാത്ത കുഷ്ഠരോഗികളുടെ അവയവങ്ങൾ എലിയോ മറ്റോ കടിച്ചുകൊണ്ടുപോയാലും അവർ അറിയുന്നില്ല; അങ്ങനെ അവയവങ്ങൾ ജീർണ്ണിച്ചു നശിക്കുന്നു. വേദന അനുഭവപ്പെടാത്ത കുട്ടികൾ തീപ്പൊള്ളലേറ്റോ പരിക്കേറ്റോ ഏതാനും വർഷങ്ങൾക്കകം മരണപ്പെടുന്നു. അതിനാൽ വേദന എന്നത് ആപത്തുകളിൽ നിന്നുള്ള ജീവരക്ഷാ സന്ദേശമാണ്.
എന്നാൽ ആധുനിക കാലത്ത് വേദനയുടെ അടിസ്ഥാന കാരണം കണ്ടെത്തി പരിഹരിക്കുന്നതിന് പകരം, വേദനാസംഹാരികൾ (Painkillers) കഴിച്ച് ആ സന്ദേശവാഹകനെ ഇല്ലാതാക്കാനാണ് പലരും ശ്രമിക്കുന്നത്. ഇത് ശരീരത്തിന്റെ സ്വാഭാവിക രക്ഷാസംവിധാനത്തെ തകർക്കുന്നു.
5.3 തുമ്മലും ശരീരത്തിന്റെ ശുദ്ധീകരണവും (00:38:44)
മറ്റൊരു ഉദാഹരണമാണ് തുമ്മൽ. തുമ്മുമ്പോൾ 'അൽഹംദുലില്ലാഹ്' എന്ന് പറയാൻ റസൂലുല്ലാഹ്(സ) പഠിപ്പിച്ചു. അനുഗ്രഹം ലഭിക്കുമ്പോഴാണ് നാം അല്ലാഹുവിന് സ്തുതി അർപ്പിക്കുന്നത്. ജീവൻ നിലനിൽക്കാൻ ഓക്സിജൻ ശരിയായ അളവിൽ ലഭിക്കണം. ശ്വാസകോശത്തിൽ പൊടിയോ കഫമോ രാസവസ്തുക്കളോ കടന്ന് തടസ്സമുണ്ടാകുമ്പോൾ, ആ തടസ്സം അതിശക്തമായി പുറന്തള്ളി ശ്വാസനാളങ്ങൾ തുറന്നുകൊടുക്കുന്ന കാരുണ്യത്തിന്റെ പ്രക്രിയയാണ് തുമ്മൽ. എന്നാൽ ഇതിനെ ഒരു രോഗമായി കണ്ട് ആന്റി അലർജി മരുന്നുകൾ ഉപയോഗിച്ച് അടിച്ചമർത്താനാണ് ഇന്ന് പലരും ശ്രമിക്കുന്നത്.
5.4 രോഗങ്ങളും പ്രതിരോധ വ്യവസ്ഥയുടെ വളർച്ചയും (00:41:20)
രോഗങ്ങൾ പ്രധാനമായും രണ്ടുതരമുണ്ട്: മനുഷ്യൻ സ്വന്തം തെറ്റായ നടപടികൾ മൂലം വരുത്തിവെക്കുന്ന രോഗങ്ങളും, പ്രതിരോധ സംവിധാനം ഭദ്രമാക്കാൻ അല്ലാഹു നിശ്ചയിച്ചിട്ടുള്ള സ്വാഭാവിക രോഗങ്ങളും. ജനിക്കുമ്പോൾ കുഞ്ഞിന്റെ പ്രതിരോധ വ്യവസ്ഥ (Immune System) ദുർബലമായിരിക്കും. എന്നാൽ 18-20 വയസ്സാകുമ്പോഴേക്ക് അത് പൂർണ്ണ കരുത്ത് നേടുന്നു.
ഈ രോഗപ്രതിരോധ വ്യവസ്ഥയെ കരുത്തുറ്റതാക്കി മാറ്റുന്നത് ചെറുപ്പത്തിൽ ശരീരത്തിൽ കടന്നുകൂടുന്ന ചെറിയ ചെറിയ രോഗാണുക്കളും വൈറസുകളുമാണ്. അവയ്ക്കെതിരെ ശരീരം ആന്റിബോഡികൾ (Antibodies) ഉൽപ്പാദിപ്പിക്കുന്നു. രോഗാണുക്കളേ ഇല്ലാത്ത അണുവിമുക്തമായ മുറിയിൽ ഒരു കുട്ടിയെ വളർത്തിയാൽ, പിന്നീട് ചെറിയൊരു ജലദോഷം വന്നാൽ പോലും അവന് അതിജീവിക്കാൻ കഴിയില്ല. ചിക്കൻപോക്സ് പോലുള്ള രോഗങ്ങൾ വന്ന കുട്ടികളുമായി മറ്റു കുട്ടികളെ ഇടപഴകാൻ വിടുന്ന പുതിയ ആരോഗ്യരീതികളെക്കുറിച്ച് അമേരിക്കൻ മാഗസിനായ 'ദ വീക്ക്' (The Week) റിപ്പോർട്ട് ചെയ്തിരുന്നു.
രോഗങ്ങളോടുള്ള മാനസിക സമീപനവും വളരെ പ്രധാനമാണ്. അനാവശ്യ ഭയവും വെറുപ്പും രോഗങ്ങളെ വഷളാക്കുന്നു. ഖുർആൻ പറയുന്നു:
﴿ فِي قُلُوبِهِم مَّرَضٌ فَزَادَهُمُ اللَّهُ مَرَضًا ﴾
(സൂറത്ത് അൽബഖറ [2]: 10)
രോഗങ്ങളോടുള്ള ശരിയായ വിശ്വാസപരമായ കാഴ്ചപ്പാട് അവയെ നമുക്ക് ഗുണകരമാക്കി മാറ്റും.
6. സത്യവിശ്വാസിയുടെ അദ്ഭുതകരമായ അവസ്ഥ (00:48:40)
6.1 സകലതും ഗുണകരമായി മാറുന്ന വിശ്വാസി (00:48:40)
സത്യവിശ്വാസിയുടെ അവസ്ഥയെക്കുറിച്ച് നബി(സ) അരുളി:
« عَجَبًا لِأَمْرِ الْمُؤْمِنِ إِنَّ أَمْرَهُ كُلَّهُ خَيْرٌ وَلَيْسَ ذَاكَ لِأَحَدٍ إِلَّا لِلْمُؤْمِنِ إِنْ أَصَابَتْهُ سَرَّاءُ شَكَرَ فَكَانَ خَيْرًا لَهُ وَإِنْ أَصَابَتْهُ ضَرَّاءُ صَبَرَ فَكَانَ خَيْرًا لَهُ »
(സ്വഹീഹ് മുസ്ലിം: 2999)
"സത്യവിശ്വാസിയുടെ കാര്യം എത്രയോ അത്ഭുതകരമാണ്! അവന്റെ എല്ലാ കാര്യങ്ങളും അവന് ഗുണകരമാണ് (ഖൈറാണ്). സത്യവിശ്വാസിക്കല്ലാതെ മറ്റാർക്കും ഈ പദവിയില്ല. അവന് സന്തോഷകരമായ കാര്യമുണ്ടായാൽ അവൻ നന്ദി കാണിക്കുന്നു (ശുക്ർ); അതവന് ഗുണമായിത്തീരുന്നു. അവന് വിഷമകരമായ കാര്യമുണ്ടായാൽ അവൻ ക്ഷമിക്കുന്നു (സ്വബ്ർ); അതും അവന് ഗുണമായിത്തീരുന്നു."
ജീവിതത്തിൽ ഉണ്ടാകുന്ന ഏത് അനുഭവത്തോടും നമ്മുടെ പ്രതികരണം ശരിയാണെങ്കിൽ ഇഹത്തിലും പരത്തിലും അത് നമുക്ക് ഖൈറായി മാറും.
6.2 ഏറ്റവും ഉത്തമമായ രണ്ടു കാര്യങ്ങളിൽ ഒന്ന് (00:50:43)
യുദ്ധരംഗത്ത് പ്രതിസന്ധികൾ നേരിടുമ്പോൾ അവിശ്വാസികളുടെ പരിഹാസങ്ങൾക്ക് മറുപടിയായി ഖുർആൻ പഠിപ്പിച്ചു:
﴿ قُلْ هَلْ تَرَبَّصُونَ بِنَا إِلَّا إِحْدَى الْحُسْنَيَيْنِ ﴾
(സൂറത്ത് അത്തൗബ [9]: 52)
"പറയുക: ഏറ്റവും നല്ല രണ്ട് കാര്യങ്ങളിൽ (ഹുസ്നയൈൻ) ഒന്നല്ലാതെ മറ്റെന്തെങ്കിലും ഞങ്ങളുടെ കാര്യത്തിൽ നിങ്ങൾ പ്രതീക്ഷിക്കുന്നുണ്ടോ?" ഒന്നുകിൽ സത്യത്തിന്റെ വിജയം, അല്ലെങ്കിൽ അല്ലാഹുവിന്റെ മാർഗ്ഗത്തിലെ രക്തസാക്ഷിത്വം (ശഹാദത്ത്). രണ്ടായാലും സത്യവിശ്വാസിക്ക് പരമമായ വിജയമാണ്. ഈ ലോകത്ത് നാം നേരിടുന്ന ഏത് സാഹചര്യത്തിലും അല്ലാഹു നിരോധിച്ചതല്ലാത്ത എല്ലാ മാർഗ്ഗങ്ങളും വിശ്വാസിക്ക് ഗുണകരമായിത്തീരും.
7. ഖദറും (ദൈവവിധി) മനുഷ്യന്റെ ഇച്ഛാസ്വാതന്ത്ര്യവും (00:52:45)
7.1 നന്മയും തിന്മയും വിധിക്കപ്പെടുമ്പോൾ (00:52:45)
ഖൈറും ശർറും അല്ലാഹുവിൽ നിന്നാണ് എന്ന് പറയുമ്പോൾ അല്ലാഹു കരുതിക്കൂട്ടി ആർക്കെങ്കിലും ദോഷം വരുത്തുന്നു എന്നല്ല അർത്ഥം. ഖുർആൻ വ്യക്തമാക്കുന്നു:
﴿ وَمَا رَبُّكَ بِظَلَّامٍ لِّلْعَبِيدِ ﴾
(സൂറത്ത് ഫുസ്സിലത് [41]: 46)
"നിന്റെ റബ്ബ് ദാസന്മാരോട് ഒട്ടും അനീതി കാണിക്കുന്നവനല്ല."
﴿ وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لَا تَعْلَمُونَ ﴾
(സൂറത്ത് അൽബഖറ [2]: 216)
"നിങ്ങൾ ഒരു കാര്യം വെറുത്തേക്കാം, എന്നാൽ അത് നിങ്ങൾക്ക് ഗുണകരമായിരിക്കും. നിങ്ങൾ ഒരു കാര്യം ഇഷ്ടപ്പെട്ടേക്കാം, എന്നാൽ അത് നിങ്ങൾക്ക് ദോഷകരമായിരിക്കും. അല്ലാഹു അറിയുന്നു, നിങ്ങൾ അറിയുന്നില്ല."
﴿ الَّذِي أَحْسَنَ كُلَّ شَيْءٍ خَلَقَهُ ﴾
(സൂറത്ത് അസ്സജ്ദ [32]: 7)
"അവൻ സൃഷ്ടിച്ച സകലതിനെയും ഏറ്റവും നല്ലതാക്കിയിരിക്കുന്നു." അല്ലാഹു സൃഷ്ടിച്ചതിൽ മൗലികമായി ചീത്തയായ ഒന്നുമില്ല. എന്നാൽ അതിൽ ചിലത് നമ്മുടെ തെറ്റായ സമീപനം മൂലം നമുക്ക് ശർറായി മാറാതിരിക്കാൻ വേണ്ടിയാണ് പ്രാർത്ഥനയിൽ « وَقِنَا شَرَّ مَا قَضَيْتَ » (നീ വിധിച്ചതിന്റെ തിന്മയിൽ നിന്ന് ഞങ്ങളെ കാക്കേണമേ) എന്ന് നാം യാചിക്കുന്നത്.
﴿ مَّا أَصَابَكَ مِنْ حَسَنَةٍ فَمِنَ اللَّهِ وَمَا أَصَابَكَ مِن سَيِّئَةٍ فَمِن نَّفْسِكَ ﴾
(സൂറത്ത് അന്നിസാഅ് [4]: 79)
"നന്മയായി നിനക്ക് എന്ത് ലഭിച്ചാലും അത് അല്ലാഹുവിൽ നിന്നുള്ളതാണ്. തിന്മയായി നിനക്ക് എന്ത് ഭവിച്ചാലും അത് നിന്റെ സ്വന്തം പക്കൽ നിന്നുള്ളതാണ്."
7.2 കമ്പ്യൂട്ടർ ഉപമ: പരിധികളും സ്വാതന്ത്ര്യവും (00:59:18)
അല്ലാഹുവിന്റെ സർവ്വാധികാരവും (മശീഅത്ത്) മനുഷ്യന്റെ തിരഞ്ഞെടുപ്പും (ഇഖ്തിയാർ) തമ്മിലുള്ള ബന്ധം മനസ്സിലാക്കാൻ ഒരു കമ്പ്യൂട്ടറിന്റെ ഉദാഹരണം ചിന്തിക്കാം. കമ്പ്യൂട്ടറിന്റെ ഹാർഡ്വെയറിനും സോഫ്റ്റ്വെയറിനും നിർമ്മാതാവ് നിശ്ചയിച്ച ചില പരിധികളുണ്ട്. ആ പരിധികൾ മറികടക്കാൻ ഉപയോക്താവിന് കഴിയില്ലെങ്കിലും, ആ പരിധിക്കുള്ളിൽ നിന്നുകൊണ്ട് നല്ലതോ ചീത്തയോ ആയ ലക്ഷക്കണക്കിന് കാര്യങ്ങൾ ചെയ്യാനുള്ള പൂർണ്ണ സ്വാതന്ത്ര്യം ഉപയോക്താവിനുണ്ട്. അല്ലാഹു നിശ്ചയിച്ച പ്രാപഞ്ചിക വ്യവസ്ഥയ്ക്കുള്ളിൽ നിന്നുകൊണ്ട് മനുഷ്യന് തെരഞ്ഞെടുക്കാനുള്ള സ്വാതന്ത്ര്യം നൽകപ്പെട്ടിരിക്കുന്നു.
﴿ فَمَن شَاءَ فَلْيُؤْمِن وَمَن شَاءَ فَلْيَكْفُرْ ﴾
(സൂറത്ത് അൽകഹ്ഫ് [18]: 29)
"ഇഷ്ടമുള്ളവർ വിശ്വസിക്കട്ടെ, ഇഷ്ടമുള്ളവർ നിഷേധിക്കട്ടെ."
8. മനുഷ്യന് മാത്രമായി നൽകപ്പെട്ട അനുഗ്രഹങ്ങൾ (01:04:26)
8.1 വാഹനങ്ങളും യാത്രകളും (01:04:26)
മനുഷ്യനല്ലാത്ത മറ്റൊരു ജീവിയും സ്വയം വാഹനം ഉപയോഗിക്കുന്നില്ല. അല്ലാഹു മനുഷ്യന് ആ സിദ്ധി നൽകി ആദരിച്ചു.
﴿ وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَىٰ كَثِيرٍ مِّمَّنْ خَلَقْنَا تَفْضِيلًا ﴾
(സൂറത്ത് അൽഇസ്റാഅ് [17]: 70)
"തീർച്ചയായും ആദം സന്തതികളെ നാം ആദരിക്കുകയും, കരയിലും കടലിലും അവരെ നാം വാഹനങ്ങളിൽ വഹിക്കുകയും, ഉത്തമ വിഭവങ്ങൾ അവർക്ക് ഉപജീവനമായി നൽകുകയും, നാം സൃഷ്ടിച്ച നിരവധി സൃഷ്ടികളെക്കാൾ അവർക്ക് വലിയ ശ്രേഷ്ഠത നൽകുകയും ചെയ്തിരിക്കുന്നു."
8.2 വസ്ത്രവും ആകാശത്തുനിന്നുള്ള വിഭവങ്ങളും (01:05:41)
﴿ يَا بَنِي آدَمَ قَدْ أَنزَلْنَا عَلَيْكُمْ لِبَاسًا يُوَارِي سَوْآتِكُمْ وَرِيشًا وَلِبَاسُ التَّقْوَىٰ ذَٰلِكَ خَيْرٌ ذَٰلِكَ مِنْ آيَاتِ اللَّهِ لَعَلَّهُمْ يَذَّكَّرُونَ ﴾
(സൂറത്ത് അൽഅഅ്റാഫ് [7]: 26)
"മനുഷ്യപുത്രന്മാരേ, നിങ്ങളുടെ നഗ്നത മറയ്ക്കാനുള്ള വസ്ത്രവും അലങ്കാര വസ്ത്രവും നാം നിങ്ങൾക്ക് ഇറക്കിത്തന്നിരിക്കുന്നു. ധർമ്മനിഷ്ഠയാകുന്ന വസ്ത്രമാകട്ടെ അതാണ് ഏറ്റവും ഉത്തമം."
വസ്ത്രം ഇറക്കിത്തന്നു എന്ന് പറഞ്ഞാൽ, സസ്യങ്ങൾ സൂര്യപ്രകാശത്തിന്റെ സഹായത്തോടെ നടത്തുന്ന പ്രകാശസംശ്ലേഷണം (Photosynthesis) വഴിയാണ് പരുത്തിയും നൂലും ഭക്ഷണവുമെല്ലാം ഉണ്ടാകുന്നത്. ആകാശത്തുനിന്ന് സൂര്യന്റെ ഊർജ്ജം കൊണ്ടാണ് ഇവയെല്ലാം ലഭ്യമാകുന്നത്. സ്വയം വസ്ത്രം ധരിക്കാനും മാറ്റാനുമുള്ള വിവേകം മനുഷ്യന് മാത്രമുള്ള വലിയൊരു അനുഗ്രഹമാണ്.
9. സമ്പത്തും ഞെരുക്കവും: പരീക്ഷണത്തിന്റെ വഴികൾ (01:09:20)
9.1 സമൃദ്ധിയും ദാരിദ്ര്യവും അളവുകോലുകളല്ല (01:09:20)
﴿ فَأَمَّا الْإِنسَانُ إِذَا مَا ابْتَلَاهُ رَبُّهُ فَأَكْرَمَهُ وَنَعَّمَهُ فَيَقُولُ رَبِّي أَكْرَمَنِ وَأَمَّا إِذَا مَا ابْتَلَاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِ كَلَّا ﴾
(സൂറത്ത് അൽഫജ്ർ [89]: 15-17)
"എന്നാൽ മനുഷ്യനെ അവന്റെ റബ്ബ് പരീക്ഷിക്കുകയും അവനെ ആദരിക്കുകയും സുഖസൗകര്യങ്ങൾ നൽകുകയും ചെയ്താൽ അവൻ പറയും: 'എന്റെ റബ്ബ് എന്നെ ബഹുമാനിച്ചിരിക്കുന്നു.' എന്നാൽ അവനെ പരീക്ഷിച്ച് ഉപജീവനം ഇടുങ്ങിയതാക്കിയാലോ അവൻ പറയും: 'എന്റെ റബ്ബ് എന്നെ നിന്ദിച്ചിരിക്കുന്നു.' ഒരിക്കലുമല്ല!"
കോടികളുടെ ലോട്ടറി കിട്ടി മദ്യത്തിലും ധൂർത്തിലും മുങ്ങി ജീവിതം തുലഞ്ഞുപോയ എത്രയോ പേരുണ്ട്. അതേസമയം തുച്ഛമായ വരുമാനത്തിൽ സമാധാനത്തോടെ ജീവിക്കുന്നവരുമുണ്ട്. സമൃദ്ധിയും ഞെരുക്കവും പരീക്ഷണങ്ങളാണ്. സുലൈമാൻ നബി(അ) പറഞ്ഞതുപോലെ:
﴿ هَٰذَا مِن فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ ﴾
(സൂറത്ത് അന്നംല് [27]: 40)
"ഇത് എന്റെ റബ്ബിന്റെ അനുഗ്രഹത്തിൽ പെട്ടതാണ്; ഞാൻ നന്ദി കാണിക്കുന്നുവോ അതല്ല നന്ദികേട് കാണിക്കുന്നുവോ എന്ന് അവൻ എന്നെ പരീക്ഷിക്കാൻ വേണ്ടി."
9.2 ശിർക്കിന്റെയും കുഫ്റിന്റെയും അപകടം (01:11:44)
രോഗമോ പ്രയാസമോ നീണ്ടുനിൽക്കുമ്പോൾ അല്ലാഹു തരാത്തത് തരാൻ മറ്റാർക്കോ കഴിവുണ്ടെന്ന് തെറ്റിദ്ധരിച്ച് വ്യാജ ദൈവങ്ങളിലേക്കും സിദ്ധന്മാരിലേക്കും ഖബറുകളിലേക്കും നേർച്ച വഴിപാടുകളുമായി പോകുന്നത് അല്ലാഹുവിന്റെ റഹ്മത്തിനെക്കുറിച്ചുള്ള അജ്ഞത കൊണ്ടാണ്. ഇത് ശിർക്കിലേക്ക് നയിക്കുന്നു. മറുഭാഗത്ത് അല്ലാഹുവിനെ നിന്ദിക്കുന്നതും നിരാശപ്പെടുന്നതും കുഫ്റിലേക്ക് നയിക്കുന്നു.
കഠിനമായ രോഗം ബാധിച്ചപ്പോഴും അയ്യൂബ് നബി(അ) അല്ലാഹുവിനോട് മാത്രം പ്രാർത്ഥിച്ച് ക്ഷമ കൈക്കൊണ്ടു; ഒടുവിൽ അല്ലാഹു അദ്ദേഹത്തിന് രോഗശമനം നൽകി.
﴿ إِنَّ رَحْمَتَ اللَّهِ قَرِيبٌ مِّنَ الْمُحْسِنِينَ ﴾
(സൂറത്ത് അൽഅഅ്റാഫ് [7]: 56)
"തീർച്ചയായും അല്ലാഹുവിന്റെ കാരുണ്യം സദ്വൃത്തർക്ക് ഏറ്റവും അടുത്താകുന്നു."
10. ഉപസംഹാരം: ദിവ്യസന്ദേശവും പ്രവാചക നിയോഗവും പരമമായ കാരുണ്യം (01:15:30)
10.1 ജീവൻ നൽകുന്ന സന്മാർഗ്ഗം (01:15:30)
പ്രകൃതിയിലെ സകല ചരാചരങ്ങളും അല്ലാഹുവിന്റെ കാരുണ്യത്തിന് കീഴ്പ്പെട്ട് തികഞ്ഞ താളപ്പൊരുത്തത്തോടെ നിലകൊള്ളുന്നു. ആ കാരുണ്യത്തിലേക്ക് സ്വയം സമർപ്പിക്കുകയാണ് മനുഷ്യൻ ചെയ്യേണ്ടത്.
﴿ يَا أَيُّهَا الَّذِينَ آمَنُوا اسْتَجِيبُوا لِلَّهِ وَلِلرَّسُولِ إِذَا دَعَاكُمْ لِمَا يُحْيِيكُمْ ﴾
(സൂറത്ത് അൽഅൻഫാൽ [8]: 24)
"സത്യവിശ്വാസികളേ, അല്ലാഹുവും അവന്റെ റസൂലും നിങ്ങൾക്ക് യഥാർത്ഥ ജീവൻ നൽകുന്നതിലേക്ക് നിങ്ങളെ ക്ഷണിക്കുമ്പോൾ നിങ്ങൾ അതിന് ഉത്തരം നൽകുക."
10.2 വിശുദ്ധ ഖുർആനും തിരുനബിയും കാരുണ്യത്തിന്റെ സ്രോതസ്സുകൾ (01:16:54)
﴿ وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ ﴾
(സൂറത്ത് അൽഇസ്റാഅ് [17]: 82)
"സത്യവിശ്വാസികൾക്ക് ശമനവും കാരുണ്യവുമായിട്ടുള്ളത് ഖുർആനിലൂടെ നാം അവതരിപ്പിക്കുന്നു."
﴿ وَمَا أَرْسَلْنَاكَ إِلَّا رَحْمَةً لِّلْعَالَمِينَ ﴾
(സൂറത്ത് അൽഅൻബിയാഅ് [21]: 107)
"ലോകർക്കാകമാനം കാരുണ്യമായിക്കൊണ്ടല്ലാതെ അങ്ങയെ നാം നിയോഗിച്ചിട്ടില്ല."
അല്ലാഹുവിന്റെ അപാരമായ കാരുണ്യത്തെക്കുറിച്ച് ശരിയായ ബോധം ഉൾക്കൊണ്ട്, ശിർക്കിൽ നിന്നും കുഫ്റിൽ നിന്നും മുക്തമായി ജീവിക്കാൻ അല്ലാഹു നമുക്കേവർക്കും തൗഫീഖ് നൽകട്ടെ. ആമീൻ.
No comments:
Post a Comment
"Comment moderation" is off in this blog.If it is not displayed, could have gone to spam.